1977 ஆம் ஆண்டு அமெரிக்க விண்வெளி ஆய்வு நிறுவனம் நாசா (NASA) விண்ணில் செலுத்திய வாயேஜர் 1 விண்கலம், மனித குலத்தின் மிகப்பெரிய அறிவியல் சாதனைகளில் ஒன்றாக இன்று கருதப்படுகிறது. பூமியிலிருந்து சுமார் 26 பில்லியன் கிலோமீட்டர் தூரத்தை கடந்துள்ள இந்த விண்கலம், மனிதனால் உருவாக்கப்பட்ட எந்த பொருளையும் விட அதிக தூரம் பயணித்த சாதனையை படைத்துள்ளது.
அதிலும் ஆச்சரியமான விஷயம் என்னவென்றால், ஏறக்குறைய 50 ஆண்டுகளாக விண்வெளியில் பயணித்துக் கொண்டிருக்கும் இந்த விண்கலம் இன்றும் பூமிக்கு தகவல்களை அனுப்பி வருகிறது. ஆரம்பத்தில் வெறும் 5 ஆண்டுகள் மட்டுமே செயல்படுமாறு வடிவமைக்கப்பட்டிருந்தாலும், அதன் ஆயுட்காலத்தை பல மடங்கு தாண்டி செயல்பட்டு வருகிறது.
வாயேஜர் திட்டத்தின் தொடக்கம்
1960 மற்றும் 1970களில் சூரிய குடும்பத்தைப் பற்றி மேலும் அறிந்து கொள்ளும் முயற்சியில் நாசா பல திட்டங்களை முன்னெடுத்தது. மெரைனர் மற்றும் பயோனியர் திட்டங்களின் வெற்றியைத் தொடர்ந்து, வியாழன், சனி, யுரேனஸ் மற்றும் நெப்டியூன் போன்ற வெளிப்புற கிரகங்களை ஆய்வு செய்யும் மிகப்பெரிய திட்டமாக வாயேஜர் உருவானது.
அந்த காலகட்டத்தில் இந்த நான்கு கிரகங்களும் அரிதாக ஒரே வரிசையில் அமைந்திருந்ததால், அவற்றை ஒரே பயணத்தில் ஆய்வு செய்யும் வாய்ப்பு கிடைத்தது. இதை விஞ்ஞானிகள் “Grand Tour” என அழைத்தனர்.
புதிய உலகங்களை காட்டிய வாயேஜர்
வாயேஜர் 1 மற்றும் வாயேஜர் 2 விண்கலங்கள் சூரிய குடும்பம் பற்றிய மனிதர்களின் புரிதலை முற்றிலும் மாற்றின.
வியாழன் கிரகத்தின் நிலவான ஐயோவில் (Io) செயல்பாட்டில் உள்ள எரிமலைகளை முதன்முறையாக கண்டறிந்தது வாயேஜர் 1. மேலும் வியாழனில் மின்னல் நிகழ்வுகளும் பதிவாகின.
அதேபோல், யுரோப்பா நிலவின் பனிப்படலத்தின் கீழ் திரவ நீர் பெருங்கடல் இருக்கக்கூடும் என்ற தகவலையும் வாயேஜர் தரவுகள் சுட்டிக்காட்டின. இது அங்கு உயிரினங்கள் வாழும் சாத்தியக்கூறுகள் குறித்து விஞ்ஞானிகளிடம் புதிய கேள்விகளை எழுப்பியது.
“வெளிர் நீலப்புள்ளி” புகைப்படம்
1990 ஆம் ஆண்டு தனது கேமரா செயல்பாட்டை நிறுத்துவதற்கு முன், வாயேஜர் 1 திரும்பி பூமியை நோக்கி ஒரு புகைப்படம் எடுத்தது.
அந்த புகைப்படத்தில் பூமி, விண்வெளியின் பரந்த இருளில் ஒரு சிறிய நீலப்புள்ளியாக மட்டுமே தோன்றியது. பின்னர் “Pale Blue Dot” என உலகம் முழுவதும் பிரபலமான அந்த படம், மனித குலத்தின் இடத்தை பிரபஞ்சத்தில் சிந்திக்க வைத்த முக்கியமான தருணமாக அமைந்தது.
சூரிய மண்டலத்தை தாண்டிய முதல் மனித உருவாக்கம்
2012 ஆம் ஆண்டு வாயேஜர் 1, சூரிய மண்டலத்தின் எல்லையை கடந்து விண்மீன்களுக்கு இடையிலான வெளியில் நுழைந்த முதல் மனிதனால் உருவாக்கப்பட்ட பொருளாக வரலாறு படைத்தது.
அதன் பின்னர் வாயேஜர் 2-வும் அதே சாதனையை நிகழ்த்தியது. தற்போது இரு விண்கலங்களும் இதுவரை நேரடியாக ஆய்வு செய்யப்படாத பிராந்தியங்களில் இருந்து மதிப்புமிக்க அறிவியல் தகவல்களை அனுப்பி வருகின்றன.
தங்கத் தகட்டில் மனித குலத்தின் செய்தி
வாயேஜர் விண்கலங்களில் ஒவ்வொன்றிலும் தங்கம் பூசப்பட்ட சிறப்பு பதிவுத் தகடு பொருத்தப்பட்டுள்ளது.
அதில் 55 மொழிகளில் மனிதர்களின் வாழ்த்துச் செய்திகள், 115 புகைப்படங்கள் மற்றும் பூமியின் பல பகுதிகளின் ஒலிகள் பதிவாகியுள்ளன. எதிர்காலத்தில் வேற்றுகிரக நாகரிகங்கள் இந்த விண்கலங்களை கண்டுபிடித்தால், மனித குலத்தின் அறிமுகமாக இந்த தகவல்கள் பயன்பட வேண்டும் என்பதே இதன் நோக்கமாகும்.
மனித குலத்தின் தேடலை பிரதிபலிக்கும் வாயேஜர்
வாயேஜர் திட்டம் என்பது வெறும் விண்வெளி ஆய்வு மட்டுமல்ல. மனிதன் பிரபஞ்சத்தில் தனது இடத்தை புரிந்து கொள்ள மேற்கொண்ட மிகப்பெரிய அறிவியல் சாகசமாகவும் இது பார்க்கப்படுகிறது.
ஐந்து ஆண்டுகள் மட்டுமே செயல்படும் என எதிர்பார்க்கப்பட்ட தொழில்நுட்பம், அரை நூற்றாண்டுக்கும் மேலாக இயங்கி கொண்டு இருப்பது அறிவியல் உலகின் மிகப்பெரிய வெற்றிகளில் ஒன்றாகும். இன்னும் பல ஆண்டுகள் வாயேஜர் விண்கலங்கள் மனித குலத்திற்கு புதிய தகவல்களை வழங்கும் என விஞ்ஞானிகள் நம்புகின்றனர்.
About The Author
